Manipur BJP-te'n politics thilah NSU hmang lo turin CM ngen

Manipur BJP state unit chuan Chief Minister Okram Ibobi chu politics thilah National Sports University chungchangah hmang lo turin an duh tih an sawi.

State BJP president Kh Bhavananda chuan, NSU chu din ngei an duh tih sawiin, sorkar laipui hmalakna do zawnga hma la lo turin state sorkar an ngen. Prime Minister Narendra Modi-a'n a lo suangtuah angin Manipur-ah hian sports university din ngei a nih theih nana hma la zawk tura an duh thu an sawi. BJP vice president M Asnikumar chuan, Okram Ibobi chu Sports University dinna turah party thil thliar lo tura ngenin, hmasawnna kawng hawn sak turin a ngen a ni.

Kum 2014 khan Manipur state BJP Unit-te chuan Prime Minister Modi-a hnenah ngenna thlenin, Imphal West-a SAI Centre Takyel-ah class ṭan mai tura an ngenna chu hlawhtlingin, tunah hian class hi kalpui mek a ni. Hetih lai hian NSU dinna tur chungchangah hian buaina a awm avangin tun thlengin building sak hna hi ṭan a la ni lo a ni.