Sorkar laipui leh ADB-te'n Assam tan inremna ziak

Sorkar laipui leh Asian Development Bank (ADB)-te chuan Assam-a power distribution system tihchangtlunna turin, US dollar maktaduai 48 hu inremna Thawhlehni khan an ziak.

ADB Board chuan July 2014 khan Assam Power Sector Investment Programme atan hian US dollar maktaduai 300 pek chhuah a lo remti tawh a ni. ADB India Resident Mission Director M. Teresa Kho chuan dolllar maktaduai 48 hian Assam state tan power lamah hmasawnna nasa tak a thlen ngei a beisei thu a sawi. Hemi chungchangah hian finance ministry chuan thuchhuah saimin, ADB leh India sorkar chuan Assam-a project kalpuina turin inremna an ziah thu a tarlang. Project hi December 2019-ah zawh hman tura beisei a ni a, Assam Power Distribution Company Ltd (APDCL) leh state sorkar kutah dah a ni ang. Inremnaah hian Finance Ministry Joint Secretary Raj Kumar, Assam Power Secretary Z Rahman Ahmed leh Assam Power Distribution Company Ltd (APDCL) MD P Gupta-te chuan hming an ziak.