Bengali pawl-te'n Tripura-a Bru awm nghehtir an duh lo
Tripura-a Bengali pawl Nagarik Suraksha Mancha-te chuan Mizoram Bru-te Tripura-a awm nghehtir tum chu duh loin, Ningani khan duh lohna an lantir.
Ningania Dasda Durga Reang Para-ah Bru-te Tripura-a awmhmun nghet pek tum chu duh lohna lantirnaah hian mi tam tak an pungkhawm a ni. He hunah hian Rashtriya Satkatha Samaj mi Advocate Chandan Dey, Bangla Pakshya Kolkata mi Kaushik Maiti-te chuan thu sawiin, Nagarik Suraksha Mancha president Ranjit Nath chuan he hun hi a kaihruai thung.
Bengali pawlte hian an thil phut 11 chu chhawp chhuakin Bru-te Mizoram-a thawn let leh chu an thil phut lian ber a ni. Sorkar laipuiin Bru-te Mizorama thawn kir loa Tripura-a awm nghehtir a tum chuan Tripura 'demographic balance' a nghawng nasa hle dawn tih a sawi bawk.
"New Delhi-a inremna ziah anga thil kalpui a nih chuan raltlan 35,000-te chu constituency hrang hrang inzawmna velah an inzar pharh anga, chu chuan buaina a siam dawn a. General constituency tam tak chu reserved constituency-ah an chang dawn a ni. A chinfelna awmchhun chu March 2016-a inremna an lo ziah tawh anga Mizoram-a thawn let leh a ni," a ti.