Ukiam-ah protest meeting nei

Assam- Meghalaya ramria chengte chuan Kulsi luia hydroelectric dam, Assam chief minister Himanta Biswa Sarma leh Meghalaya chief minister Conrad K. Sangma te thlawpna hnuaia siam tumna duh loh lantirna atan protest meeting an nei.

Assam leh Meghalaya Joint Resistance Committee meeting hi Ukiam community hall-ah Zirtawpni khan neih niin, hydroelectric dam siam duh loh lantirna tura hma an lak zel dan tur an sawi ho a ni.

Meeting hi social activist Rajani Boro chuan a kaihruai a, committee member-te chuan state pahnih thawk dunin tuikhuah siam an tum leilung leh a chhehvel bakah eizawnnain a tuar theih dan turte an sawi lang. Assam unit-a committee secretary Maniram Rabha chuan he project in a nghawng tur mipuite hnenah pawh zirtirna kalpui a ṭul thu a sawi. Meghalaya unit preseident Albert Nonglai chuan an committee thutlukna angin chief minister Conrad K. Sangma hnenah memorandum an thehlut dawn tih a puang bawk.

Chairperson Rajani Boro chuan he tuikhuah project hi kalpui a nih chuan tualchhung mite khawsak a ti buai dawn a; loneitu, sangha mantu leh eizawnna tenau neiten harsatna an tawh tur thu a tarlang.