Tripura : CM-in state cyber police station hmasa ber hawng

Tripura chief minister Manik Saha chuan state Cyber Crime Police Station hmasa ber chu AD Nagar Drop Gate, Agartala-ah a hawng. CM chuan cybercrime chungchanga buaina thleng pung zelte sawilangin, heng buaina thleng laka mipui venhimna leh inzirtirna ṭha zawk kalpui a nih theihna tura ruahman a nih thu a sawi.

Chief Minister chuan pawikhawihtuten tunlai thiamna changkang zawk hmanga pawi an khawih ṭhin thu tarlangin, heng laka inhumhumna turin technology lama thiamna neih leh inralring reng a awm a pawimawh a ni, a ti.

CM Saha chuan cyber police station tharah hian senior police officer, SP leh DySP official dah an nih tur thu sawiin, technology lama thiamna sang tak nei an mamawh thu leh, digital platform hmanga inbumna a pun nasat thu a sawi. Heng digital platform-te hi dik lo taka hmang an tam thu te, sum lama inbumna a tam thu sawi a ni bawk. Hengte hi thil hlauhawm tak a nih avangin a rang lama hma lak a ṭul thu CM Saha chuan a tarlang. Hetiang thila buaina tawkte ṭanpuina tur national cybercrime helpline bakah helpline dang state police-in an tlangzarh leh tawh bawk a ni.