Tripura: GBP hospital-ah hlawhtling takin kal thlak

Tripura khawpui Agartala-a GB Pant hospital-ah a vawi thumna atan kal thlak, kidney transplant chu hlawhtling taka neih a ni. Hemi atan hian Shija Hospital & Research Institute, Manipur-a doctor team-te leh GB Hospital-a Urology and Nephrology department doctor thiam tak takte an thawk ho a ni.

GBO Hospital deputy superintendent Kanak Chowdhury chuan kal petu leh a dawngtu chu an dinhmun a ṭhat thu sawiin, an pahnih hian Radhanagar, Agartala mi an nih thu a sawi. GBP hospital-ah hian kum kal ta June 8 khan a vawi khatna atan hlawhtling takin kal an lo thlak tawh a, a vawihnihna hi November thla khan neih leh a ni.

Tripura chief minister Manik Saha chuan a official social media X-ah thuchhuah siamin, AGMC & GBP Hospital leh Manipur-a Shija Hospitals & Research Institute ṭangkawpin hlawhtling taka kal transplant vawithumna an nei leh chu lawmawm a tih thu sawiin, medical team-te inpekna leh tumruhna a fak.