Assam : Subansiri Hydroelectric Project thawk ṭan dawn hnai

National Hydroelectric Power Corporation (NHPC) chuan Thawhṭanni khan thuchhuah siamin, hun rei tak chhung an nghah tawh National Dam Safety Authority (NDSA) aṭanga clearance hnuhnung ber tih fel a nih hunah Assam-a Subansiri Lower Hydroelectric Project hna chu thawh ṭan a ni thei dawn dawn tih a puang.

Subansiri Lower HE Project hi unit thum, 250 MW ṭheuha siam tur a ni a, NDSA aṭangin clearance chauh an nghak tawh a, rei loteah an hmuh theih an beisei tawh a ni.

2,000 MW Subansiri Lower Project hi Ministry of Power hnuaia kalpui a ni a, India rama hydroelectric lian ber pawl tur a ni. North Lakhimpur, Arunachal Pradesh leh Assam ramria awm niin, he project bulhnaiah hian Nagaon rel station a awm bakah, Lilabari leh Dibrugarh airport pawh hla lo teah a awm bawk.

NOHC chuan heng unit pathumte hi June 2025 aṭanga thawh ṭan turin ruahmanna an lo siam tawh a, unit panga dang 250 MW pawh May 2026-a zawhfel hman turin an lo duang tawh bawk a ni. An hna thawh hi December 2011 aṭanga October 2019 khan tualchhung stakeholder-ten lungawi lohna an lantir avangin tih tawp lailawk a lo ni tawh a ni. Kum riat chhung tih khawtlai a nih tawh avangin project-a an sum sen tur Rs vbc 6,285 chu Rs vbc 26,000-ah a pung chho tawh bawk a ni.

He project-ah hian generating unit pariat a awm dawn a, Assam-in 533 MW an dawng dawn a, Arunachal Pradesh-in 274 MW an dawn dawn bakah, a bak hi hmarchhak state dang Manipur, Meghalaya, Nagaland, Tripura leh Mizoram te chuan 198 MW ṭheuh an dawng thei dawn bawk a ni. Hmar lama state - Haryana, Punjab, Rajasthan, Uttar Pradesh leh Chandigarh te chuan 387 MW leh, khawthlang lam Gujarat, Madhya Pradesh, Chhattisgarh, Maharashtra leh Goa te chuan 613 MW an insem dawn bawk.