Nagaland: NDMSSP Compliance Course hawng

Nagaland sorkar chuan Nagaland Disaster Management Authority (NSDMA), school education department leh education tech company NagaED nena thawk hoin Nagaland Disaster Management School Safety Policy (NDMSDSP) Compliance course thawh hnihna a hawng.

He course hi sorkar leh mimal sikula zirtirtute hnena khuarel chhiatna thlen thula inralrin dan zirna leh sikul himna kawnga hma an lak dan tur zirtirna a ni. Dec 1, 2023 khan chief minister Neiphiu Rio chuan he course thawh khatna hi a lo hawng tawh a, zirtirtu 7,567 in ziaklutin, educator 3,193 te chuan course hi an zo fel tawh a ni.

A thawhnihna hian zirtirtu in ziaklut tawhte tan course zawhfelna tura tih a nih bakah, a thar pawh an in ziak lut thei bawk. Digital format-ah hian interactive video, quiz, real-life case study awmin, a zirtute hian nitina an hnathawhna ti buai loin course hi an zo thei dawn a ni.

NSDMA joint CEO Johnny Ruangmei chuan an hmalaknain a tum bulpui ber chu zirtirtu, naupang leh sikul zawng zawng, khawi hmuna mi pawh hmaih bik awm loa he safety training neihpui hi a nih thu a sawi. Zirna in chu a him tur a ni ti ringawt loin, mawphurhna a ni tel tur a ni, a ti.

NagaED co-founder Kevisato Sanyu chuan he hmalakna hian zirna ina himna a thlen bakah digital hmanga hmun hla leh tlawhpawh loh thleng pawha zirna an dawn theihna tura Nagaland inpekna a ni tih a sawi. NagaED hi tualchhung technology company niin, zirna kawngah digital hmangin theihtawpin hma an la a ni.