Nagaland : Sum tlakchham vangin Project thawh nan sorkar hnathawkte hlawh pawhpen tum

Nagaland sorkar chuan sum lam a tlakchham avangin an state chhunga development project hrang hrang thawh chhunzawmna turin sorkar hnathawkte hlawh pawhpen a tum. 

State chief secretary Temjen Toy chuan hemi chungchang hi sawichhuakin, sorkar chuan infrastructure lam tih­hmasawnna turin a hnathawkte hlawh pawhpen mai a rawt tih a sawi a, mahse a rawtna siam hi tihfel erawh a la ni lo tih a sawi. 

"Nagaland-in sum a indaih loh em emna chhan pakhat chu state dangte angin income tax emaw, property tax emaw kan pe ve lo a ni. Mahse hetichung hian sorkar aṭangin facility hrang hrangte chu kan dawng ve reng tho a ni. Professional tax chu lak ni ve mah se, eng tham mah a  ni lo. Sorkar laipui hnenah pawh professional tax hi tipung turin kan ngen fo a, mahse hei hi ram danpui kaihhnawih thil a nih avangin siamṭhat te a ngai dawn a, an tihfel mai rin a ni lo," tiin Toy chuan a sawi. 

Chief secretary chuan, "State chhunga industry lian leh investor-te hipluh pawh kan tum hle a, mahse thil harsa tak a ni. Special provision, 371A hman a nih vangin tribal ram chu humhalh a ni a, hei vang hian investor-te pawhin Nagaland rawn luh chu an hlauthawng ṭhin. Hengte avang hian  kan entrepreneur-te pawhin harsatna pawh an tawh phah bawk a ni," a ti. 

State sorkarin sum lama harsatna a tawh avangin sorkar hnathawkte an hlawh aṭanga state hmasawnna han thawhna tur a pek ve lohna chhan tur a awm lo tiin, Temjen Toy chuan sorkar hnathawkte hlawh pawhpen sak chungchang hi rorellai, BJP thawhpui NDPP pawh sawpui tawh a ni tih a sawi. "Political leader-te pawhin hei hi an thlawp a, anmahni hlawh ngei pawh pawhpen theih a nih thu an sawi. Mahse he thil hi dan ang taka  kalpui a  nih theihna turin fimkhur takin kan ngaihtuah mek a ni," tiin a sawi. 

Ministry of Development of North Eastern Region (DONER) leh North East Council (NEC) kaltlangin hmar­chhak state-te hian central fund dawng hlawm mah se, state tam zawk hian sum lamah harsatna an tawk a, hei vang hian hmasawnna kawngah pawh an hnufual phah a ni. 

Nagaland chief minister Neiphiu Rio chuan 2019-2020 state budget a pharhah, kumin atan Rs vbch 1611.98 deficit budget a ni. Nagaland-ah industry liante a awm lo a, an budget-a sum tam ber pawh sorkar hnathawkte hlawhah a kal ral ṭhin tih official-te chuan an sawi.