Nagaland : Sorkarin coopertive society ṭhenkhat ti tawp dawn

Nagaland public health engineering and cooperation minister Jacob Zhimomi chuan Inrinni khan cooperative society ṭhenkhat, hna thawk ṭha lo leh leiba ngah lutukte chu tih tawp an ni dawn tih a puang.

Minister Zhimomi chuan International Cooperative Day program, Registrar of Cooperative Societies office, Kohima bulhnai Meriema-a neihah he thu hi sawiin, endikna pawh kalpui a ni thuai dawn a ni, a ti.

Zhimomi chuan mi tumah tuar tir an tum loh thu sawiin, mipui leh state ṭhatna tur a nih zawk thu a tarlang. Sorkarin cooperative society a thlawp thu leh an ṭhanlenna kawnga pui tura a inpek reng thu a sawi rualin, an hnathawh ṭhat leh ṭhat lohah a innghah thu a tarlang bawk.

Multi-purpose cooperative society tam takte hnathawh ṭhat avangin Zhimomi chuan lawmthu a sawi a, Naga-te chu hnathawk nasa hnam an nih thu a sawi rualin, tih chhunzawm peihna leh teirei peihna an tlakchham thu sawiin, sumdawnnaa hlawhtling tur chuan teirei peih a pawimawh a ni, a ti. Deputy Registrar of Cooperative Societies Akangjongshi tarlan danin, Nagaland-ah hian tun dinhmunah cooperative society inziak lut 8,028 an awm mek a, 5,862 te chu hna thawk ṭha lo an ni. Hei vang hian department chuan October 2025 chhungin cooperative society 3,000 chuang tih tawp a tum ta a ni.