Assam: CM-in Baksa district hmasawnna hnathawh endik

Assam chief minister Himanta Biswa Sarma chuan Inrinni khan Baksa district tlawhin, hmasawnna hna thawh leh kalpui dan a endik. Udalguri leh Tamulpur district-ah review meeting a kaihhruai zawhin, CM Sarma chuan Baksa hmasawnna tur atana hmalakna chi nga sawi hona hun a buatsaih leh bawk.

Meeting-ah hian BTR official, department head leh state sorkar senior officer-te an tel. Orunodoi 3.0, Mukhyamantri Mahila Udyamita Abhiyan, Mukhyamantri Atmanirbhar Asom, Eti Koli Duti Paat, leh Ration Card scheme kalpui dan chu power point presentation hmanga neih a ni.

Orunodoi scheme-ah hian Baksa leh Manas Assembly contituency aṭangin hamṭhatna dawngtu mi 46,998 an awm tawh a, a thawh hnihnaah mi 59,000 in hamṭhatna dawng thei tura duan a ni. CM Sarma chuan department-te hnenah tih tur ṭulte chu a hun taka a zo fel turin a hriattir a, state sorkar chuan September thlaa hamṭhatna dawng turte hnena sem chhuah turin a ruahman a ni, a ti.

Chief minister chuan Mukhyamantri Mahila Udyamita Abhiyan hmalakna endikin, he scheme hnuaia hnathawh tur la awm te chu July thla chhunga zo fel hman turin a hrilh bawk. Ration Card scheme hnuaiah Baksa leh Manas huam chhungah mi 4,000 dah belh niin 1,29,860 ten he scheme hnuaiah hian hamṭhatna an dawng mek a ni.