Assam-ah political party thar ding

Assam-ah political party thar, Asom Gana Mancha (AGM) din a ni. Hetih lai hian All Assam Students' Union (AASU) pawhin political party din tumin pawl hrang hrangte nen kawng an dap mek nia sawi a ni bawk. Political party thar, AGM hruaitu Simanta Kumar Dutta chuan an party chu state leilung fate dikna chanvo  humhalhna tura theihtawp a chhuah dawn tih a sawi. 

Dutta chuan, "Kum 2021 Assam election-ah AGM chuan seat awm zawng zawng, seat 126-ah a chuh vek dawn a ni. Ram leilung fate dikna leh an chanvote venhim leh humhalh chu a tum ber a ni ang," a ti. Assam-ah hian AASU huaihawtin Citizenship (Amendment) Act (CAA) duh lohna lantir chhunzawm reng a la ni. AASU chuan an hmalakna kal zelah political party thar din an tum a, hei hi February thla hnu lamah ngaihtuah an tum nia sawi a ni. 

Assam chief minister hlui leh Congress hruaitu, Tarun Gogoi chuan an state aṭanga BJP paihthlakna turin political party thar a din chu a ṭul  niin a lo sawi tawh. Political party thar din chuan an party pawhin chhiaht phahna a neih phah mai thei a, mahse hemirual hian an duhdan chauh ngaihtuah thei an ni tawh lo a, Assam mipuite venhimna tur chu an dah pawimawh ber a ngai a ni,tiin a sawi. Tualṭo party dinte chu BJP paihthlakna tura an thawhpui theih tur thu pawh a lo sawi tawh bawk.