Manipur : Governor-in Van Mahotsav kaihruai

Manipur governor Ajay Kumar Bhalla chuan Pathianni khan Van Mahotsav vawi 76-na lawmna, Kangla Fort Complex-a neih chu a kaihruai. He hunah hian Governor chuan rampuma campaign kalpui mek "Ek Ped Maa Ke Naam 2.0." hnuaiah thingṭiak a phun a, City Convention Centre-ah festival grand-finale a hmanpui leh bawk a ni.

Governor Bhalla chuan Manipur ecology heritage hausaknate sawi langin, state leilung faten ramngaw humhalh kawnga theihtawp an chhuah avangin a fak bawk. Ramngaw tih chhiat leh sik leh sa inthlak danglam nasa tak karah khua leh tuite chu hma la vat turin a ngen. Thing phun tam pawimawhnate sawilangin, prime minister Narendra Modi hawn Ek Ped Maa Ke Naam 2.0 hmangin khua leh tui zawng zawngin chenna leilung leh a chhehvel humhim nan thing phun uar turin a fuih bawk.

Governor chuan state-level painting intihsiakna lawmman a sem bakah, tun hnaia ramngaw kang ṭhelh tura mi inpete chawimawina a hlan. District tin zirlai aiawhte hnenah thing phun tur a pe bawk a, Van Mahotsav 2025 lehkhabu a tlangzarh nghal bawk. Forest Department-ten kar khat chhunga district 16-a thing maktaduai 1.3 an phun hman chu ropui a tiin a fak hle bawk a ni.