CAA hi NE state-te koh harhna a ni : UDP

Meghalaya-a Meghalaya Democratic Alliance (MDA) ṭangrual sorkara tel, United Democratic Party (UDP) chuan Citizenship (Amendment) Act (CAA) chu hmarchhak state-te tan dik lo taka ramdang aṭanga rawn lut leh ram leilung fa ni lote'n an chim ral mai tur lo dang a, hma la turin koh  harhna a ni, a ti. 

UDP general secretary Jemino Mawthoh chuan Ningani khan an party executive meeting neiin, CAA leh Inner Line Permit (ILP) chungchang an sawiho tih a sawi. Mawthoh chuan an party chuan CAA chu an duh lo tih a sawi a, "He dan hi awmze nei lo nia kan ngaih avangin kan dodal a ni. Supreme Court chuan he dan chungchangah hian thutlukna fing tak a siam pawh kan ring a, kan ngaichang a ni. CAA pass a ni kha hmarchhak state leh Meghalaya mipuite koh harhna a ni. State zawng zawngte chu ram dang aṭanga dan loa rawn lutte leh ram leilung fa ni loten an chimral mai tur lo dang a, he buaina chinfel dan ngaihtuah tur hian an thawh ho a ngai a ni," a ti. "Kum 40 zet chu dan loa rawn lut ṭhinte chungchang hi kan buaipui tawh a ni. Tunah chuan hmarchhak state te tan awmze nei a, ram leilung fate humhalh leh vennaa an chet a hun ta a ni," tiin UDP hruaitu chuan a sawi.