Assam-in district inkharkhipna thlahdul
Assam sorkar chuan state chhunga district inkharkhipna thlah dulin, nimin aṭang khan district danga tangkhangte an khaw lama hawna hun a siam chu April 30 thleng a pawtsei.
State sorkar hian April 25-27 chhung atan state chhunga district inkharkhipna siam hi a thlahdul a, mahse haw duh an tam avangin a pawtsei leh a ni.
Assam health and family welfare minister Himanta Biswa Sarma chuan state transport corporation chuan district danga tangkhang, mahni khaw lama haw duha dilna 41,651 an dawng tih sawiin, Pathianni thleng khan mi 2,585 chu hruai haw an ni tawh tih a sawi. Nimin khan mi 12,000 vel chu hruai haw an ni leh ang. Heng bakah hian mahni motor nena district danga tangkhang, mahni khaw lama haw duha dilna thehluh hi 73,000 vel zet an awm bawk. Assam mi nuai nga chuang hi state dangah tangkhang an la awm mek bawk a ni.
Assam-a Covid-19 kai enkawl zinga pariat chu Pathianni khan damdawiin aṭangin chhuahtir an ni a, he hri kai enkawl dam tawh hi mi 27 an tling tawh a ni. Assam-a hri kai hmuhchhuah mi 35 zingah pakhatin a thihpui tawh a, a tam zawk enkawl dam tawh niin tunah hian enkawl lai pasarih chauh an awm tawh.
Minister chuan an state-a hri kai enkawl dam rate cu 77% a ni tih sawiin, sample 7,616 test a ni tawh tih a sawi. PPE kit nuai 2.70, N95 mask 52,000 leh triple layer mask nuai 46 an nei tih a sawi bawk.