Meghalaya : Ward's Lake-ah plastic food packet khap

Meghalaya Tourism Department chuan Shillong khawpuia Ward's Lake humhalh leh a fai zawkna turin plastic hmanga ei tur fun, plastic food packet ken luh a khap a, tualchhung mite pawhin an thlawp ṭha hle.

Ward's Lake enkawl hna hi Tourism Department hian Forest Department kut aṭanga a lak hnuah khapna hi a siam zui nghal a ni. Official-te chuan hehi Ward's Lake leh a chhehvel vawn fai a, a tlawhtute tan a lo thianghlim zawk a, khaw hawi te a nawm zawkna tur a ni tih an sawi. Tourism official-te chuan Ward's Lake huam chhunga bawlhhlawh paih a tam ṭhin a, a bikin thil tuamna plastic leh bottle te a tam a, hei hi dil tan pawh hian a ṭha lo tih an sawi.

Tourism minister Paul Lyngdoh chuan Ward's Lake cheiṭhat hna thawh a nih tur thu pawh a lo puang tawh a, chief minister Conrad K Sangma chuan an rawtna theh luh pawh a pawmsak tawh a ni. A thawh khatna atan budget hi Rs vbc 18 dah a ni. Hemi hmang hian thil thar siam tum a ni a; leisure and entertaiment zone, cafe leh musical fountain dah an tum. Lake hawn theih hun pawh hi zan dar 10 thleng pawhsei tum a ni bawk. Mi tam zawkin an tlawh theihna turin sorkar chuan Lake pawhtu kawngte pawh tih len a tum a ni.