Manipur University VC-in zirlaipawlte inremna ziahpui leh Academic Council Member-te'n banna thehlut

Manipur University-a academic council member-te chu Vice Chancellor Adya Prasad Pandey-a'n zirlai pawlte memorandum of understanding (MoU) a ziahpui danah lungawiloin, council member aṭangin an vaiin an bang.

MU VC Pandey hian November 7 khan Mani-pur-a zirlai pawl pali-te chu admission kalpui danah 'Central Educational Institu-tion (Reservation in Admission), Act 2006, (amended in 2012) hmang turin inremna a ziahpui a ni. Hemi chungchangah vek hian Ningnani khan zirlai pawl parukte chu inremna a ziahpui leh bawk. Hei hi accademic council member-te chuan
ṭha an tih loh thu sawiin, university-in thutlukna a lo siam tawh tih danglam leh a nih chu an hrethiam lo a, VC hnenah banna an thehlut ta tih an sawi.

Tunhnaia VC-in zirlai pawlte MoU a ziahpui dan hian, October 8-a academic council-in admission kalpui dan tura ruahmnanna a lo siam tawh chu a paihthla a ni. Academic council hian reservation norms (2006) behchhanin, Scheduled Tribe (ST) tan 7.5%, Scheduled Caste (ST) 15% leh Other Backward Classes (OBC) tan 27% seat hausak turin ruahmanna a kalpui a, hetiang hian 2016-2017 session-ah pawh admisssion chu eng emaw chen kalpui a ni tawh. Mahse zirlaite nawrna nasa tak avangin siam ṭhat leh a ni a, CEI Act 2006 (amended in 2012)-in seat reservation a siam angin kalpui a ni leh ta zawk a ni. Admission tih theih hun chhung chu November 14 thleng pawhsei a ni a, inremna siam angin admission pawh kalpui leh a ni. CEI Act 2006 (amended in 2012)-in seat reservation a siamah chuan - ST tan 31%, SC tan 2% leh OBC tan 27% hauhsak an ni.

VC chuan Thawhlehni khan council member-te chu bang lo tura a hmin theih a beisei thu a lo sawi tawh a, University ṭhat nana hmalakna a nih thu a sawi lang bawk. Nilaini khan Manipur University Teachers Association chuan emergency general body meeting an lo nei tawh bawk a, zirlai pawlte nena MoU ziah a nih dan an sawiho a, an thlawp leh thlawp loh erawh an tarlang lo. General body meeting neih zawh hnu hian VC chuan deparment head leh dean-te chu conference hall-ah meeting a neihpui leh a, mahse VC hian academic council member-te'n ban an dil chungchang engmah a sawi chhuak lo nia tarlan a ni.

Manipur University chuan admi-sssion kalpui danah Central Educational Institution (Reservation in Admission) Act 2006, kum 2012-a siamṭhat chu hman rem tiin, seat reservation chungchangah zirlai pawl hrang hrangte chu inremna a ziahpui. Vice-chancellor Adya Prasad Pandey leh Registrar Th. Shymkesho-te chuan, All Tribal Students Union, Manipur, Democratic Students Alliance of Mani-pur, All Naga Students Association, Manipur leh Kuki Students Organisation aiawhte chu Thawhṭanni khan inremna hi an ziahpui a ni. Nilaini vek khan zirlai pawl dangte inremna ziahpui an ni leh tawh a, hei hi academic council member-te chuan an duh lo a ni.

Manipur University-in seat reser-vation a kalpui danah hian tribal zirlaite chu lungawi loin, campus chhungah buaina an chawk chhuak a, building
ṭhenkhatah kangmei a chhuak bawk. Tribal-te chuan 2016-2017 session atana admission kalpui dan chu ṭha an tih loh thu an sawi a, tribal zirlaite tan seat tam zawk hausak an phut. CEI Act 2006 (Amended in 2012)-in hnam hrang hrangte tana seat reservation a duan hman a nih theih nan, University thuneitute nen vawi eng emaw zat an indawr hnuah inremna an siam thei ta a ni.

Academic council member-te'n VC hnena banna an thehluh hi pawm a nih leh nih loh tarlan a la ni lo.