Assam cabinet-in APSC Chairman ban remti

Assam cabinet chuan Assam Public Service Commission (APSC) chairman, Rakesh Kumar Paul chu a nihna aṭanga ban a remti.

Chief Minister Sarba-nanda Sonowal-a kaih-hruai cabinet meeting meeting chuan Paul ban tur hian thutlukna a siam ta nia tarlan a ni. Hetih lai hian APSC chairman hi President chauhin a ban thei a, mahse state cabinet chuan SPSC emaw UPSC kaltlangin, Supreme Court-ah Article 317 tlawhchhanin ban turin an thlen thei a ni.

APSC chairman Paul hi thamna sum laah puh niin, kar kalta Inrinni khan thamna sum lak thubuaiah man a ni a, ni 14 chhung police custody-ah dah turin special court chuan thu a pe. Lawyers Association leh KMSS-te chuan Paul-a chu bail-a chhuah a nih lohna turin Court-ah petition an lo thehlut tawh bawk. Paul bakah hian member dang Samedur Rahman pawh tunkar Nilaini khan man ve leh a ni. Assam sorkar chuan hnuchhui hna vil turin Special Supervisory Team (SST) a din tawh a, Dibrugarh police-te nen
ṭangkawpin ngawrh takin beihpui an thlak mek a ni.

APSC member-te hi Assam Police Service leh Assam Civil Service hnuaia hna lak hrang hrangah thamna sum laa puh an ni. Thubuai kal zelah hian mi 300 vel zet an inhnamhnawih nia tarlan a ni a, an zingah hian minister hlui leh MLA bakah sorkar mi pawimawh eng emaw zat hming lam rik a ni. Assam CM Sarbananda Sonowal chuan Assam Public Ser-vice Commission hnuaia hna lak dana thil fel lo awm chu pawi a tih thu a lo sawi tawh a, thamna sum la te chu hremna pek an nih ngei tur thu a sawi.