Pawisa note thiin Manipur nghawng

Prime Minister Naren-dra Modi-a'n Rs 500 leh Rs 1000 note tih thih a nih thu, November 8-a a puan chuan Manipur a nghawng na hle nia tarlan a ni.

Rs 500 leh Rs 1000 note tih thih a nih thu PM-in a puan hnu khan Manipur hmun hrang hrangah chuan dawr inkhar hmuh tur a tam hle a, damdawi dawr thlenga khar a ni. State water tax collection centre chu khar nghal a ni a, private insurance company-te pawh an inkhar nghal vek bawk. A bikin hill district hmun hrang hrangah nghawng a nei lian nia tarlan a ni. State capital, Imphal-ah pawh nghawng a neih thu tarlan a ni bawk.

Pawisa note thih thu hian ram chhung a fan chhuak rang hle a, media-te buaipui ber a ni zui bawk. Dodaltu tam tak an awm laiin, Modi-a chet dan faktu tam tak an awm. Hmarchhak state zingah, Arunachal Chief Minister Pema Khandu chu sum chheprelh tih-tawp a nih theih nana hmalakna thlawptu langsar a ni. Khandu chuan Modi chu lawmpuina thawnin, thutlukna dik tak a siam thu a hrilh. Khandu chuan sawi lawkna awm loa pawisa note tih thih chuan sum chhepprelh ven kawngah rahṭha a chhuah ngei a beisei tih sawiin, hel ten sum nasa taka an vaivir ṭhin chu a ziawm phah a ring. Arunachal mipuite chuan a thuthlukna siam avanga thinlung taka an lawmpui thu Prime Minister a hrilh a ni.