Hayuliang by-election EC-in Kri nomination hnawl

Arunachal Pradesh-a Hayuliang assembly constituency by-election neih tura Independent candidate, Yompi Kri-i nomination file chu Election Commission-in a hnawl sak.

Yompi Kri hi Cong-ress-in official candidate atana hman an tum, state sorkarin pension a dilna a hnawlsak tak, PHED & WS chief engineer Lapalum Kri-a nupui a ni. Nomination file hnawl sak a nih chungchangah hian, Kri-i hian election code of conduct a bawhchhia niin state BJP unit chuan an sawi. BJP thuchhuah chuan, Kri hian dan a bawhchhiat bakah, a nomination paper hnawl sak a nih chuan poli-tician-te chu beih a tum thu district returning officer chamber-ah a lo sawi tawh niin an tarlang. Hei bakah hian BJP tana campaign-te chu kawng hrang hranga tihbuai a tum niin an sawi a, inthlanna felfai tak a awm theih nana hma la turin state sorkar an ngen tih an tarlang bawk.

Arunachal Pradesh Congress Committee (APCC)-te chu Hayuliang legislative assembly constituency by-election neih turah hian, an party candidate atana an thehchhuah Lapalum Kri-a nomination file, state election officer-in a hnawlsak avangin Gauhati High Court-ah an lo zualko tawh. Kri hi Public Health Engi-neering department-a Chief Engineer ni lai a ni a, by-election-ah hian Congress ticket-a din a tum avangin Voluntarily Retirement Scheme (VRS)-a pension a dil a, hei hi state sorkar chuan a pawmsak lo a ni.

Hayuliang by-election neih turah hian candidate mi pali te chuan nomination file-in, Independent candidate pahnih - Yompi Kri leh Konteso Kri-te an awm. BJP chuan Arunachal chief minister hlui, Kalikho Pul-a nupui Dasanglu Pul-i chu an thehchhuak a, hetih lai hian Congresss Candidate Lapalum Kri-a nomination file erawh hnawlsak a ni thung. Hayuliang constituency hi chief minister hlui Kalikho Pul-a bial a ni a, Pul hi August thla khan a boral a ni. November 19-ah by-election hi neih a ni dawn a, November 22-ah vote chhiar a ni ang.