Meghalaya chief justice thar lalut Ni 14 chhung inkhung hrang nghal dawn
Meghalaya High Court chief justice thar Justice Biswanth Somadder chu Thawhṭanni khan rinawmna thu tiam tira lakluh a ni. Mahse chief justice thar hi state pawn aṭanga lut a nih avangin hri leng vangin tihdan phung pangngai angin ni 14 chhung a chhungte nen an inkhung hrang nghal dawn.
Justice Somadder hi Meghalaya governor Tathagatha Roy chuan rinawmna thu a tiamtir a ni.
Justice Sommader hi a hmain Allahabah High Court judge a ni a, kar liam ta Zirtawpni tlai khan a chhungte nen Uttar Pradesh aṭangin motor-in Shillong hi an pan a, km 2,000-a thui tlanin Pathianni khan an thleng a ni. Deputy chief minister Prestone Tysong chuan kalphung an neih angin, chief justice thar leh a chhungte hi an inah ni 14 chhung an inkhung hrang nghal dawn tih sawiin, sorkarin dan a siam chu tupawhin an zawm a ngai a ni, a ti. Chief justice pawhin hei hi a hrethiam hle tih a sawi bawk.