Manipur : Security force-in ruihhlo Rs vbc 100 hu an man

Central security force leh Manipur civil police ṭangkawpin ruihhlo do beihpui (anti-drug operation) darkar 36 chhung an kalpuinaah ruihhlo Rs vbc 100 man hu an man. He beihpui thlakna hi Manipur ramri bakah Assam leh Myanmar-ahte an nei tel a ni. Ruihlo zuar mi pahnih an man bawk.

Beihpui an thlakna hmasa zawkah Assam Rifle leh Manipur police-te chuan Maruti A-Star lirthei chu Singjammei Chinga Malhong, Singjamei Police Station, Imphal West district-ah rinhlelh thil thuah an ti ding a, an lirthei endiknaah sahbawn bawma heroin, No.4 tiha hriat lar thuhruk chu an hmuchhuak a ni. Lirthei khalhtu Md. Azad Yumkhaibam, 32, Irong Cheisaba, Iring Umang Khunou khua, Thoubal district-a cheng chu man nghalin, team-te hian heroin gram 105.4 an mansak a ni.

Hmun danga beihpui an thlaknaah Mihir Roy, 26, Kanakpur Part-II, Rangirkhari, Silchar, Cachar ami hnen aṭangin sahbawn bawm 616-a brown sugar, kg 10.096 an man bakah narcotic leh psychotropic tablet nia rinhlelh kg 5.280 an mansak bawk.

Sajik Tampak, Chandel district-ah pawh ruihhlo inhlanchhawnglai hmuh niin, an mi rinhlelhte hi an tlanchhe hman a ni. An lirthei an tlanchhiatsan tak an endiknaah opium kg 50.5 leh Burma pawisa Kyat vbc 1.24 bakah India pawisa, Rs vbc nuai 2 an man bawk. Heng an thil mante hi Chakpikaring Police Station-ah chhuizui tura hlan an ni.