Nagaland University-ah incubation center buatsaih dawn

Nagaland-a central university awmchhun, Kohima-a Nagaland University chu sorkar laipui hmalakna hnuaiah hmarchhak biala incubation centre buatsaihna hmun tura ruat pali zingah a tel. He incubation centre-a thawk ṭha 50 te chu startup atan Rs nuai 5 thleng an dawng thei dawn a ni.

Batch hmasa berah hian mi 44 te chuan hamṭhatna an dawng dawn a, chung zingah chuan Arunachal Pradesh aṭangin mi 16, Assam aṭangin mi paruk, Manipur aṭangin mi pali leh a dang zawng chu Nagaland aṭangin a ni. An mi thlante hi tun thla chhunga tih fel tum a ni.

He hmalakna hnuaia tih tur hrang hrang chu Entrepreneurship Development Center and Incubation Centre, Nagaland University coordinator, Dhrubajyoti Bordoloi chuan sawifiahin, industry lama tawnhriat neite leh entrepreneur-te chuan incubate-te hnenah zirtirna an pe dawn a, thla ruk chhung workshop, Ideathon, Bootcamp, leh Hackathon buatsaih tum a ni, tiin a sawi.

University hi 'Establish, Develop, and Manage Entrepreneurship Development Centres and Incubation Centres in the Educational Institutes of the North Eastern Region' project hnuaia thlan a ni. He project hi North Eastern Council, Shillong thlawpna hnuaia kalpui niin, Indian Institute of Entrepreneurship (IIE), Guwahati-in a thawk a ni.

North Eastern Council hi North Eastern Region economic leh social development atana nodal agency niin, state pariat Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura te an awm. IIE hi sorkar laipui Ministry of Skill Development and Entrepreneurship hnuaia pawl pakhat a ni thung.