Assam : Japanese Encephalitis vangin kum 7 mi thi

Assam-a Jorhat district huam chhung, Dholi Samaguri Tea Estate-a cheng hmeichhe naupang kum sarih mi chu Japanese Encephalitis (JE) vangin a thi. He natna, thosi seh aṭanga kai theih hi Upper Assam-ah a hluar hle a, thihna hial a thlen tak avangin ngaihven a hlawh thar hle.

Hmeichhe naupang nunna chan ta hi Barsha Munda niin, JE natna hi a vei tih hriatchhuah a nih hnuah Jorhat Medical College and Hospital (JMCH)-ah enkawl a ni a, uluk taka enkawl ni mah se a damchhuah tak loh avangin helai hmuna cheng, a bik takin thingpuife huana chengte zingah hlauhthawnna nasa tak a siam a ni. Health thuneitute chuan he natna hi a darh tih la puangzar lo mah se vantlang mipui an chiai nasa tawh hle a ni.

Hri kai an pun zel laia Tea estate thuneitute leh health department lamin invenna atana ruahmanna an siam loh avangin mipuite chuan an lungawi loh thu an sawi. Thawktute chuan plantation drain-ah thosi pianna hmun hmuh tur a tam tih sawiin, tifai tura hmalakna a awm loh thu an sawi. Heng tui luankawrte hi tih fai loha a awm rei tawh thu leh, mi tam tak an damlo tawh thu sawiin, an dinhmunin chhiat lam a pan zel an hlauh thu an tarlang.

Health department chuan thosi hlo a thosi kah vawikhat an lo nei tawh a, a chhunzawmna a awm tawh loh thu mipuite chuan an sawi. Hri kai an pun zel avangin vawi khat chiah thosi kah chuan awmzia a nei lo tih an tarlang. Tea estate thuneitute leh health department-te chu a rang lama hma laksak turin an ngen a ni.