China-in Arunachal Pradesh bulah mega-dam a siam ṭan

China chuan hydropower project lian tham tak chu Arunachal Pradesh bul, Tibet chhim lama Yarlung Tsangpo luiah Inrinna khan a thawk ṭan ta. Project hi trillion yuan 1.2 (USD tld 167.1) senna tura ruahman niin, hydropower station panga a awm dawn a ni. Zawhfel a nih hunah chuan China-a Yangtze luia tuikhuah pathum awmsa aiin a lian zawk dawn a ni.

China dam siam tum hi a hma aṭangin Arunachal Pradesh bakah India sorkar laipui pawhin a ngaimawh a, an ngaihven reng thu pawh an lo sawi tawh a ni. Arunachal Pradesh chief minister Pema Khandu chuan China tui khuah tur hian a chhehvela cheng mipuite tan harsatna nasa tak a thlen dawn tih sawiin, China chu rin ngam an har thu leh an thil tum tak chu tumahin an hre lo tiin a sawi. He project hian an state tan nitin khawsakah pawh harsatna a thlen theih dawn a ni tiin, a bul hnaia chengte in leh lo, ram leh mihring nunna thlengin a hlauhawm dawn a ni, a ti.

CM Khandu chuan sorkar laipui nen inrawnkhawmna an neih hnuah, Arunachal Pradesh chuan Siang Upper Multipurpose Project kalpui a tum tih CM Khandu chuan a sawi. He project hian venhim hna a thawk dawn a, helai biala tui vawnhimna a awm theihna turin a pui dawn a ni, tiin CM chuan a sawi bawk.

China foreign ministry chuan nikum December thla khan project hian a ṭha lo lam zawngin nghawng a nei dawn lo tih an sawi ve thung. He project siamna tur hi kum 2024 khan China sorkar chuan a pawm a, he tuikhuah aṭang hian kum nga chhungin electric MW 60,000 siam chhuah theih an beisei.