Meghalaya: Education Minister-in sikul tih changtlung ngaipawimawh turin MLA-te a ngen

Meghalaya education minister Rakkan A Sangma chuan sikul infrastructure tih changtlung kawngah mipui aiawh tura thlan, MLA te chu mawhphurna la tura hriattirin, sorkar hmalakna ringawta innghah chuan hlawhtlinna leh inthlak danglamna a awm theih loh thu a sawi.

Thawhlehnia press conference a neihah Sangma chuan zirna facility ṭha zawk chu a rang lama mamawh a ni tih a sawi a, state MLA 60 te leh MP pahnihte chu fund an dawn tawh sa aṭanga sikul tih hmasawn leh tih changtlung kawngah nasa taka hna thawk turin a ngen. MLA pakhat ṭheuhin kum khat chhungin sikul 50 tana hna an thawh chuan, infrastructure tih hmasawnnaah a pui dawn tih Sangma chuan a tarlang bawk.

Sangma chuan a bial chhung Rongara-Siju, South Garo Hills district-a sikul 45 thawmṭhatna kalpui mek pawh a hmunah ngei a tlawh thu sawilangin, heng sikul thawmṭhat leh tih changtlunna atan hian MLA Local Area Development Scheme aṭangin Rs nuai 2 lak chhuah a ni, a ti.

MLA scheme hnuaiah hian Meghalaya legislator tinte chuan Rs vbc 2.5 chu infrastructure leh hmasawnna kalpuina atan kumtin an dawng ṭhin. Heng fund-te hi tualchhung project thawhna atan pawh a hman theih nia sawiin, sikul thawmṭhat bakah tui in tur supply aṭanga thingtlang kawng siam leh health facility atan pawh hman ṭhin a ni tih official-te chuan an tarlang. Fund hi kumtin dawn ni mah se, sorkar sikul tam tak chuan inthiarna hmun ṭha an nei loa, classroom a la changtlung loin sikul bungrua an la nei ṭha lo hle bawk.