Manipur : Meitei chhungkua an in leh loah kir leh ṭan

Manipur-a kum hnih chuang liam taa chi leh chi inkara tualchhung buaina chhuak avanga chenna in leh lo chhuahsana hmun danga khawsa, Meitei chhungkuate chu Imphal West dristrict-a an khua Kangchup-ah an kir leh ṭan ta. An chenna inte hi a chhe tawh hlawm hle a, a ṭhen chu hal an nih bakah hun rei tak chhuahsan an nih tawh avangin siamṭhat a ngai nasa hle.

Tualchhung buaina chhuak vang hian mi 50,000 chuangin harsatna an tawk a, mi tam tak relief camp-ah khawsain, nitin khawsakna lamah pawh an harsa hle. Sorkar chuan tun hnai khan chenna in leh lo chhuahsan mi sang chuang sawnchhuah an ni dawn tih a lo puang tawh a ni.

Kangchup khaw mipuite chenna tur sak ṭhat bakah, infrastructure pawimawh thawm ṭhat tura ruahman a nih thu official-te chuan sawiin, heng hna thawk tur hian hun a duh rei dawn tih an sawi bawk. Kangpokpi district-a Faijang huamchhunga chhungkua 184 aṭanga mi 896 te chu chenna lailawk siamsakah an la khawsa mek a, sorkar aṭanga puihbawmna an dawn avangin an dinhmun pawhin ziaawm lam a pan zel. Mahse hunrei tak an in leh lo an chhuahsan tawh avangin nunphung pangngai ang an la zawh thei lo a, zirna leh hna an zawn chawpte a la ngai dawn a ni.