Assam: Sorkarin Divyang-friendly campus din dawn

Assam sorkar chuan ri hriatna lama harsatna nei, bengngawngte pualin Guwahati-ah Divyang friendly campus din a ni dawn tih a puang. He infrastructure project atan hian Rs vbc 3.5 sen a ni dawn a, ri hriatna lama harsatna nei zirlaiten zirna lama an mamawh an dawn theihna tura ruahman a ni.

Assam-a Water and Social Justice & Empowerment minister Pijush Hazarika chuan an hmalakna tur hi puangin vantlang mipui, section tin ami ten zirna intluktlang leh ṭha an dawn theihna turin sorkar chuan theihtawp a chhuah zel a ni, a ti. Chief minister Himanta Biswa Sarma kaihhruainain he hmalakna hi kalpui a ni tih tarlangin, CM chuan Divyangjan (pianphunga rualban lo) te tihchak leh tihhmasawn kawngah theihtawp a chhuah thu a sawi.

Hazarika chuan Chief Minister kaihhruaina hnuaiah Divyang zirlaiten zirna ṭha leh changtlung bakah, infrastructure an mamawh ang thlap an neih theihna turin hma an la mek tih a sawi. Campus thar tur North East College for the Hearing Impaired-ah hian tunlai bungraw changkang leh facility hman awlsam leh changtlung zawk hman a ni dawn tih a tarlang.

Facility tharah hian classroom pakua a awm dawn a, library leh meeting hall a awm bawk ang. Hmeichhia leh mipa awm hranna tur dormitory a awm dawn bakah warden quarter, infiamna hmun leh auditorium lian a awm dawn bawk a ni.