Manipur : Dengue vangin mi pakhat thi

Manipur-a district 11-ah dengue hri vei an pung mek zel a, district zingah hian Imphal West, Imphal East leh Churachandpur te pawh an tel. Dengue vang hian mi pakhat a thih tawh bakah mi 91 in an vei mek a, midang 150 te pawh dengue vei nia rinhlelh an awm bawk.

Directorate of Health Services data aṭanga a landanin, kum 2025 kum chanve chhunga dengue natna avanga nunna chan hi Bishnupur district aṭanga report a ni. West Imphal-ah hian mi 50 in an vei mek a, Imphal East-ah mi 11, Thoubal-ah mi pakua, Kamjong-ah mi pakhat, Senapati-ah mi pakhat, Tamenglong-ah mi pakhat, Chandel-ah mi pakhat leh Tengnoupal-ah mi pakhat ten an vei.

National Centre for Vector Borne Diseases Control (NCVBDC) in a tarlan danin, kum 2024 khan Manipur-ah hian dengue vangin mi panga an thi a, mi 2,463 in an vei bawk. Kum 2019 khan mi 359 in an vei a, kum 2020 ah mi 37, kum 2021 ah mi 203 niin, kum 2022 khan mi 503 in an vei bakah mi paliin an thihpui tawh bawk a, kum 2023 khan mi 2,548 in an vei bawk a ni.

Thosi seh aṭanga kai theih he natna hi tui tlingah an piang nasa hle a, state sorkar health thuneitute pawhin mihring chenna leh a chhehvela tui luankawr leh tui tling tamna hmunte chu tifai ṭhin turin an lo hriattir tawh a ni. Dengue rawn hluar hi thianghlim leh faina lam kenkawh ṭhat tawk loh vang leh, thosilen leh thosi hlo supply an dawn ṭhat loh vang niin, a bik takin relief camp-a khawsa mekten an tuar nasa zual a ni. Thuneitute chuan sorkarin thosi hlo kah leh chemical hmanga thosi pianna hmun tihchhiat bakah, thosi hloa thosilen chiahte pawh nasa taka an lo kalpui tawh thu an sawi.