Meghalaya HC-in Aadhaar chauh pawm lo turin a ti

Meghalaya High Court chuan sorkar aṭanga hamṭhatna dawng turte, a bikin zirlaiten scholarship an lakna tura an nihna finfiahna turin Aadhaar chauh pawm lo turin a ti a, Aadhaar nei lote tan ID dang pawh pawmsak turin thuneitute a hriattir.

Chief justice IP Mukerji leh justice W Diengdoh awmna bench chuan sorkar chuan Aadhaar nei lote chu PAN card, voter ID leh passport pawh a pawmsak tur a ni, a ti.

Court hian social activist Greneth M Sangma-a'n kum 2023-a sorkar thuchhuah chungchanga PIL a thehluh a ngaihtuah hnuah hriattirna hi a ti chhuak a ni. Sorkar thuchhuah chuan sorkar aṭanga hamṭhatna hrang hrang dawng tur tan Aadhaar number an neih tel a phut a ni. Aadhaar an phut zingah hian SC/ST zirlai tana Post Matric Scholarship leh sum lama puihna pekna turte pawh a huam tel.

Bench chuan diltute nihna rang zawka finfiahna turin Aadhaar chu sorkarin a duh pawh a ni thei a, mahse hemi rual Aadhaar a awm lo a nih chuan document dang pawh a pawm tur a ni, a ti. Aadhaar number neih loh chu hnawl phahna a ni tur a ni lo, tiin a sawi.