Manipur : UNC-te'n kawngpui dang chhunzawm zel Petrol leh diesel man a sang

Manipur Chief secretary Oinam Nabakishore chuan an state-in petrol leh diesel-ah harsatna an tawh thu Nilaini khan a sawi.

Nabakishore chuan October thla tawp lam aṭanga United Naga Council (UNC)-te'n nawrh an huaihawt avanga harsatna tawk an nih thu sawiin, mipuite harsatna suking tura state sorkarin hma a lak mek thu a sawi. UNC-te'n lungawilohna lantira kawngpui pawimawhte an dan chah avangin oil tanker 150 vel zet chu Assam-a Khatkhati-ah an tangkhang mek tih sawiin, truck 1,800 chu Manipur border, Mao Gate-ah an tang mek a ni, a ti. Hengte avang hian mipuiten harsatna nasa tak an tawk chho mek a, pump zawng zawng deuh thaw khar a ni tawh. Oil bakah nitin mamawh lakkhawm kawngah harsatna an tawk mek a, thil man a sang chho zel bawk niin a sawi.

United Naga Council-te hian Jiribam leh Sadar Hills-te state sorkar-in district-ah hlankai tuma hma a lakna chu duh loin, October thla tawp lam khan darkar 48 awh nawrh an huaihawt a, hei hi an chhunzawm chho zel a ni. Naga pawl hrang hrangte chuan nawrh huaihawt hi thlawpin, Naga-te chenna bial chhung hmun hrang hrangah kawngpui an dang a ni.

Hetih lai hian Jiribam leh Sadar Hills-te district-ah puan a nih mai loh avangin, Imphal East district-a hmun hrang hrangah state sorkar nawr nan kawngpui dan a ni ve mek bawk. District pek phuta nawrh huaihawt te hian state sorkar chu hma la chak tawk loah puhin, lungawi lohna an lantir a, nunphung a khaihlak phah nasa hle nia tarlan a ni. Jiribam leh Sadar Hills activist-te chuan Chief Minister Okram Ibobi Singh chu ngawi reng loa district thar puang thuai turin an ngen.

Manipur-ah hian petrol litre khat Rs 180-ah a kai chho tawh a, pump-ah lei tur a awm loh avangin a black-a hralh a ni. Diesel man pawh a sang chak hle a, nawrh hi tihtawp a nih thuai loh chuan thil man a san chhoh zel a hlauhawm bakah, mipuiten harsatna nasa zawk an tawk chho thei a ni.