RBI leh Meghalaya sorkar aiawhten meeting nei

Reserve Bank of India chuan Rs 500 leh Rs 1,000 note tih thih ni mah se, Meghalaya sorkar chu an mamawh ang tawk Rs 100 note an pek tur thu a hrilh.

Pawisa nawi indaihlohna ching fel tur hian RBI aiawh leh state sorkar mi pawimawhte chuan Additional Chief Secretary, Y Tshe-ring kaihhruainain meeting an nei a. RBI lam chuan Rs 100 note mamawh zat phuhru tura hmalak an tiam a, harsatna awm theite sukiang tura hma lak zel a nih tur thu an sawi. Finance official lam chuan Rs 2,000 note thar chuan an state a thlen tawh thu an sawi bawk.

Hetih lai hian Minister of State for Home Affairs Kiren Rijiju chuan hmun kilkhawr zawka chengten harsatna an tawh lohna turin bank hrang hrangte chu an huang zauh tura hriattir an nih thu a sawi. Hemi chungchangah hian Reserve Bank of India chuan chak takin hma a la nghal tih sawiin, branch thar eng emaw zat hawn belh turin ruahmanna a siam tawh a, a bikin hmun kilkhawr zawkah hawn belh a ni ang, a ti.

SBI Regional Manager Dipak Chowdhury chuan hmarchhak state-te'n pawisa thi avanga harsatna lian tham an tawh loh thu sawiin, mipuite tan chiaina tur a awm lo, a ti. Mipuite chu bank hnathawkte thawhpui a, an laka hawihhawmna lantir tura a ngen thu sawiin, dawhthei taka awm turin a chah. Chowdhury chuan Nilaini khan Guwahati-ah senior bank official-te chuan high-level meeting an neih thu sawiin, harsatna awm theite sutkian a nih theih nan hma lak dan tur an sawiho niin a sawi.

Tripura-ah chuan State Electricity Corporation, gas dealer leh travel agency-te chuan Rs 500 leh Rs 1,000 note an dawng duh lo nia tarlan a ni a, hei hian mipui tan harsatna a thlen a ni. Hmarchhak state danga petrol pump leh gas dealer-ah te chuan harsatna a awm hriat a ni lo thung. Northeast Frontier Railway (NFR) Chief Public Relations officer Pranav Jyoti Sharma pawhin hmarchhak huam chhunga railway station hrang hrangah te harsatna a awm loh thu a sawi bawk.