EGM-te'n I&B ministry chet dan dem

Editors Guild Manipur (EGM) chuan sorkar laipuiin NDTV (Hindi) channel leh Assam-a TV News channel 'News Time Assam'-te chunga hremna a lek chu an dem thu an sawi. I&B ministry chuan November 9 khan heng news channel pahnihte ni khat chhung atan a kharsak a ni.

EGM-te chuan he thil an duhlohna lantir hian, Nilaini khan state chhunga chanchinbu hrang hrangte chuan an editorial a blank-in an dah a, sorkar laipui chu thuthlukna a siam danah an dem thu an sawi. He hmalakna hi Editors Guild of India chuan an thlawp thu sawiin, sorkar laipui chetdan chu 'freedom of the media' palzutna a ni, an ti. November 7 khan Manipur-a journalist-te chuan he thil an duh lohna lantir hian, All Manipur Working Journalists’ Union (AMWJU) buatsaihin Press Club-ah lungawilohna an lo lantirin tawh bawk. AMWJU president Banners chuan,“Ministry of Information and Broadcasting-in NDTV channel leh News Time Assam-te chunga hremna a lek chu 'Freedom of expression' bawhchhiatna a ni" a ti.

I&B ministry chuan November 9 khan NDTV Hindi channel leh ‘News Time Assam’-te chu ni khat chhung atan a khar sak. NDTV hian Pathankot thil theng a report danah dan a bawhchhia niin I&B ministry chuan a tralang a, Assam-a TV News channel ‘News Time Assam’ pawh Cable TV Networks (Regulation) Act a bawhchhiah nia sawiin, an chungah hremna a lek ta a ni.