Assam railway tih changtlunna turin inremna siam

Union Railway Minister Suresh Prabhu chuan Assam sorkar nen rel kawng thar siam turin inremna cheng vaibelchhe 5,000 hu siam a nih thu Ningani khan a sawi.

Union minister Prabhu hian Ningani khan double railway line, Bongaigaon - Kamakhya via Goalpara Town chu a hawng a, Assam sorkar nen thawk dun tura ruahmannna an siam thu hi a puang a ni. Ruahman dan chuan New Guwahati station leh Kamakhya station te thlunzawm tum a ni. Prabhu chuan Kamakhya leh New Guwahati station thlunzawm tur hi khawpuia lirthei chevel tibuai lo thei tur ang bera siam a ni ang, a ti. Assam-a a cham chhung hian electric hmang Raninagar Jalpaiguri – Guwahati via Rangiya railway line siamna tur lungphum a phum bakah, Barak valley-a Karimganj - Maishashan rel service a vai liam bawk.

Union Railway Minis-ter chuan Assam Chief Minister Sarbanada Sonowal-a'n railway project a ngai pawimawh chu lawmawm a tih thu sawiin, hmasawnna kawng pawimawh tak a ni, a ti. Sonowal pawhin state chhunga district headquarters tin rel-in a thlunzawm theih nan hma lak pui turin Union minister a ngen bakah, ṭhalai tam zawkin railway chu eizawn nana an hman theih nana hma lak puiah a sawm a ni. Assam hi hmarchhak state zingah railway lama hmasawn chak berte zinga mi niin, station hrang hrang thuam ṭhat hna a thawk ṭha hle bawk.