Manipur : UNC-te'n ni 10 chung NH dang tawh Pawl hrang hrangten UNC-te chetdan duhlohna lantir

United Naga Council (UNC)-te chuan Sadar Hills leh Jiribam-te state sorkarin district-a hlankai a tumna duh lohna lantirin ni 12 chhung zet nawrh an huaihawt tawh. Hei hi Imphal East district-a pawl hrang hrangte chuan an dem thu sawiin, UNC chet dan duh lohna lantir hian kar kalta Inrinni aṭang khan Imphal-Ukhrul inkar kawngpui an dang chat ve leh.

Imphal leh Ukhrul district inkara lirthei tlan te chu Khurai Konsam Leikai-ah YOS Club, Khurai Konsam Leikai, AWON Lup leh Khurai Konsam Leikai Chaokhat Khongthang Nupi Lup-te chuan an dang a ni. Hill district huam chhunga kawngpui zawng zawng dang vek turin hma an la mek nia tarlan a ni bawk. Imphal West-a Khoyathong area-ah pawh UNC-te chet dan duh lohna lantir hian pawl ṭhenkhat chuan nawrh an huaihawt a, Senapati district pana tlan lirtheite chu an dang a ni.

Nawrh huaihawttu pawl hrang hrangte chuan, UNC-te'n ni eng emaw zat chhung National Highway an dang chu pawi an tih thu sawiin, tawpsan turin an phut tih an tarlang. UNC-te hian October 30 zanlai aṭang khan NH an dang ṭan a, hei hi tun thlengin an la kalpui a ni. Hemi anih avang hian mipuite chuan ei leh barah harsatna an tawk mek a, thil man a sang chak hle. Alu kg khat man chu Rs 40-ah a kai chho tawh a, petrol litre khat Rs 200-ah a kai chho tawh bawk. Oil harsatna avang hian All Manipur School Students Tranporters’ Association-te chuan chawlh an puang a, school zawng zawng deuh thaw khar a ni.

UNC-te chuan Manipur sorkarin district-a hlankai a tum Sadar Hills leh Jiribam-te chu Naga-te ram “Naga territory” a ni an ti a, state sorkar hmalakna chu nasa takin an dodal.