Manipur Chief Minister - Okram Ibobi Singh

Manipur-a Congress party-in kum 15 chhung zet lal ṭhuthleng a luah theih nana mi pawimawh ber te zinga mi, Okram Ibobi Singh hi kum 1948, June 19 khan a piang a, chief minister ni lai mek a ni. Ibobi Singh hi Thoubal District-a Athokpam-ah chhungkaw rethei tak aṭangin a lo piang a, an unau zingah upa ber niin, pianpui mipa panga leh hmeichhia pathum a nei. D.M. College, Imphal aṭangin a graduate a, hemi hnu hian politics luhchilhin, tun hun hi a thleng ta a ni.

Political career

Ibobi Singh hi Indian National Congress member a ni.

Kum 1984 khan a vawi khatna atan Manipur legislative assembly election-ah Independent Candidate-in a ding a, thlan tlin zui a ni. Khadi and Village Industries Board-ah hun rei tak chhung chairman a ni. Congress party a zawm hnu kum 1990 khan, Indian National Congress (INC) ticket-in a ding a, hneh taka thlan tlin a ni. State sorkar-ah hmun pawimawh chang chhoin, Minister atan lakluh a ni a, hun eng emaw chen Industries deparment a enkawl.

Kum 2002 March thla khan Manipur chief miniter 11-na atan hian lakluh a ni. Kum 2012 Legislative Assembly Election-ah khan Congress party chuan seat 60 awmah seat 42 a la a, a ṭum thumna atan chief miniter atan lakluh leh niin, tun thlengin he dinhmun hi a la luah. Ibobi Singh hi L. Landhoni Devi nen in neiin, Devi hi kum 2012 khan Khangabok Constituency aṭangin MLA-ah thlantlin a ni a, Thoubal District aṭanga hmeichhe MLA hmasa ber a ni.

Beih a tawk

November 2006 khan Manipur CM hian beih tawkin, People's Revolutionary Party of Kangleipak-te chuan a chenna in an suasam. Hemi hnu hian beih a tawk fo a, kum 2008 September 2 khan Imphal-a a chenna ina a mu lai chu helten an bei a ni. He thil thlengah hian security guard pakhat chuan hliam na tak a tuar a, Singh leh a chhungte chu an him hlauh a ni. People's Revolutionary Party of Kangleipak-te chuan he thil thleng hi an tih a nih thu an sawi a, state police-te'n hel laka beihpui an thlak ṭhin titawp tura an ngenna leh an phuba lakna a nih thu an sawi.

Tun hnai lawk khan Manipur CM hian Ukhrul district-ah beih tawk lehin, sorkar programme pawimawh ti hman loin state khawpui Imphal-ah helicopter-a phurh let a ni. He thil thlenna hmunah hian hel leh security force-te chu an inkap zui a, security force mi pakhatin hliam a tuar. Naga hel National Socialist Council of Nagaland - Isak-Muivah (NSCN-IM) te chu pawikhawihtuah ngaih an ni. NSCN (IM)-te chuan Manipur CM hi Naga-te hmusit leh enhrangah an puh a ni.

Dodalna

Kum 2015 August thla khan Manipur Assembly chuan bill pathum - The Protection of Manipur Peoples Bill, 2015, The Manipur Land Revenue and Land Reforms (7th Amendment) Bill, 2015, leh The Manipur Shops and Establishments (Second Amendment) Bill, 2015 te a pass a, hei hi tribal-te chuan an dodal nasa hle.

Heng bill pathumte avang hian Ibobi Singh-a kaihhruai Congress sorkar chuan dem a hlawh hle a, a bikin tribal-te'n an dodal nasa zual. Tribal-te chuan Congress sorkar-a tribal MLA-te chu bang turin an nawr fo a, MLA eng emaw zat chuan an nihna hlipin, Congress party an chhuahsan tawh a ni.