Dengue vangin Gauhati HC Judge boral

Gauhati High Court judge Nishitendu Chau-dhury (55) chu kar kalta Inrinni khan private hospital-ah dengue natna vangin a boral.

Justice Chaudhury hi May 22, 2013 khan Gauhati High Court judge atan ruat a ni. Chief Minister Sar-bananda Sonowal chuan Chau-dhury chu a ui thu sawi-in, dengue natna avanga thi an awm fo chu pawi a tih thu a sawi. Assam-ah hian dengue natna vei thar hmuh chhuah an awm reng a, thi an pung chho zel bawk. State sorkar chuan dengue do let tur hian hma a la mek a, state health department chuan review committee a din tawh.

Assam-ah hian dengue natna vei mi 2,854 hmuh-chhuah tawh an ni a, tun hnaiah he natna vei hi mi 90 vel hmuhchhuah belh leh an ni tawh. A darh zel tur ven nan leh mipuite an him zawk theih nan health deparment chuan 'review committee' a din a ni. District hrang hranga health officer, malaria officer, Indian Medical Association, district medical officer, health service director leh Gauhati Medical College Hospital-a microbiology HOD-te chuan hma an la reng bawk. Assam-a Kamrup-ah chuan dengue vei hi mi 458 chuang an awm tawh. Kamrup hi dengue vei tamna ber niin, a bikin hmeichhiaah a hluar nia tarlan a ni a, health worker te chu in tinah kalin, he natna hi a darh zel loh nan hma an la a ni. Mipuite chu dengue virus hnathawh dan leh a lanchhuah dante hrilh hriat an ni.

State health department chuan mipui hnenah thosilen an sem chhuak a, school ṭhenkhatah awareness campaign an buatsaih bawk. Dengue hi thosi chi khat Aegypti seh aṭanga kaichhawn theih a ni a, enkawl dam theih a ni.