NGT-in NH-37 khar turin thupek chhuah

National Green Tribunal (NGT) chuan Ka-ziranga National Park (KNP) huam chhunga National Highway-37 chu khar turin kar kalta Zirtawpni khan a hriattir.

NGT Chief Justice Swatanter Kumar chuan, "NH-37 hian KNP a paltlang a, lirthei che velin ramsa eng emaw zat nunna a la tawh a ni, hemi titawp tur hian state sorkar hriattir a ni a, hmalakna a awm mai loh vangin khar turin thupek chhuah a ni ta a ni" a ti. Kumar chuan kumin chhungin NH-ah hian political rally buatsaih theih a ni tawh lo tih sawiin, state chief secretary chu thupek a a bawhzui loh avangin jail-ah tantir theih a nih thu a sawi. Tribunal-in thupek a chhuah chu zawm mai theih a ni loh thu Kumar chuan a sawi bawk.

NGT green panel chuan BJP kaihhruai sorkar chu NH-37 traffic chungchangah hian December 15 2016 hmaa report thehlut turin a hriattir a, road accident avanga ramsa thi zat hriattir turin thu a pe bawk. State transport secre-tary chu traffic chungchangah hma la tura hriattir a ni a, hearing neih leh turah tel tura tih a ni.

Environmentalist Rohit Choudhury chu KNP paltlanga Jakha-labandha - Bokakhat inkar NH-37 kawngpui zauh tur chungchangah NGT-ah hian a zualko a ni. NGT chuan Kaziranga Park huamchhung, NH-37 kawngpui sira dawrte chu ramsate himna tur ngaihtuahin khar turin thupek a lo chhuah tawh a, Gauhati High Court pawhin NH-37 aṭanga metre 100 huamchhungah dawr siam khap turin thupek a lo tichhuak ve tawh bawk.

National Green Tribunal hian Assam sorkar chu ramsa himna kawnga chak zawka hma la tur leh, lirthei che vel laka ramsa te an him leh him loh vilna turin kawngpui dungah camera dah turin a hriattir bawk.