Manipur-ah petrol litre khat Rs 300-ah kai chho

United Naga Council (UNC)-te'n October 30 aṭanga National Highway an dan chah avangin, Manipur-ah chuan petrol litre khat man chu Rs 300-ah a kai chho tawh.

Manipur sorkar-in Sadar Hills leh Jiribam-te district-a hlankai a tum duh lohna lantir hian UNC-te chuan Naga-te chenna hmun hrang hrangah NH an dang chat a, hei hian nunphung a tikhaihlak nasa hle. Manipur sorkar chuan Assam-a bungraw phur truck tangkhang mekte chu venhimna hnuaiah state chhunga hruai luh an nih theihna turin ruahmanna a kalpui mek. Chief Minister Okram Ibobi Singh chuan, November 1 aṭanga NH kawngsira tangkhang tawh truck eng emaw zat hruai chhuak tur hian Armed police-te rawih an ni dawn tih a sawi. Chief secretary Oinam Nabakishore chuan pawl ṭhenkhatte chu nawrh titawp tura ngen an nih thu sawiin, an harsatna tawh mek sukiang tura hma an lak reng thu a sawi.

Hun rei tak chhung kawngpui dan a nih tawh avang hian, petrol, diesel, khawnvartui leh gas-ah te mipuiten harsatna an tawk mek a ni. Thil man a san chhoh zel avang hian mipuiah nghawng a nei lian hle tawh nia tarlan ani. Hetih lai hian Jiribam leh Sadar Hills area-a chengte chuan state sorkar chu district puitlingah hlangkai thuai turin na zawka kar an tum thu an sawi. Manipur-ah hian oil a harsatna vangin veivahna a buai phah hle a, school eng emaw zat chu khar a ni tawh bawk.