Manipur-ah railway station building lungphum phum

Union Railway Minister Suresh Prabhu chuan Manipur-a Tupul-ah kar kalta Inrinni khan station building sakna tur lungphum a phum.

Northern Frontier Railway buatsaihin, 1st Manipur Rifles Parade Ground-ah hun hman a ni a, he hun hmanpuitu Union Railway Minister Prabhu chuan hmarchhakin kawng hrangah hma a sawn zel thu a sawi. Railway minister chuan kum 2008 aṭang khan Jiribam -Tupul - Imphal inkalpawhna tur railway project, km 111-a thui chu kalpui ṭan a nih thu a sawiin, sorkar laipuiin a pawimawhna hriain National Project-ah a pawm a ni, a ti. Km 12.5 a thui Jiribam - Dolakhal section chu kumin March thla khan hawn a ni tawh tih a sawi. Jiribam - Tupul Section-ah hian lei verh 37 zet a awm a, chung zinga 29 chu zawhfel a ni tawh a ni bawk.

Tupul-a station building sakna atan hian cheng vaibelchhe 70 ruahman a ni a, kangmei chhuak leh rikrum thilah pawh him thei tura sak a nih tur thu Union Railway Minister Suresh Prabhu chuan a sawi.

Hetih lai hian Union Human Resources Development minis-ter Prakash Javadekar chuan Manipur-a National Highway kawngpui pawimawh zualte chu sorkar laipui chuan world class standard-in a siam dawn niin a sawi. He thu hi BJP buatsaih Nambol Bazar-a 'political conference' neihah a sawi chhuak a ni. Union minister chuan Imphal-Aizawl kalpawhna chu four-lane-a siam tum a nih thu a sawi a, Manipur hmingthanna pakhat 'Loktak Lake' chu chei
ṭhat a nih tur thu a sawi bawk.

Union road transport and highways minister Nitin Gadkari chuan thla thar hian Manipur hi a tlawh ve leh ang bawk ang.