Sikkim : MP-in BRO chief state kawng infrastructure tichangtlun turin ngen

Sikkim Lok Sabha MP Indra Hang Subba chuan New Delhi-ah Border Roads Organisation (BRO) Director General hmuin ramri huamchhung, a bik takin Sikkim hmarlam leh khawchhak lama infrastructure hmasawnna ngaihven zual turin a ngen.

Meeting-ah hian Gangtok aṭanga Zeema kaltlanga Sikkim hmarlam, Chungthang leh Lachen kalpawhna kawng dinhmun sawiin, helai kawng hi state-a hmun hla leh tlawhpawh loh kalna atan a ṭangkai hle thute a sawi. Subba chuan helai kawng hian uluk taka thawmṭhat a mamawh thu sawiin, kumtluana khaihlak awm loa hman theih a ṭul thu a sawilang. Hei bakah leimin, tuilian leh khuarel chhiatnain buaina a thlen avanga an buaina ṭhin pumpelh turin highway dang a rang lama neih an mamawh tih a sawi bawk.

Subba chuan Sikkim khawchhak lam Zuluk bulhnaiah kawng dang siam a ṭul tih BRO hotu chu a hrilh bawk a ni. Zuluk hi khualzin tlawhtu tamna hmun a ni a, a hmun mawi tak bakah '32 hairpin bends' chu an larpui hle bawk. Subba chuan helai huamchhunga hmun sak tharnaah pawh tourism, ecology, leh tualchhung mite eizawnna atana pawimawh leh kawngpuite chu humhalh turin a ngen a ni.

MP chuan Sikkim ramria intlawhpawhna siam chu hmasawnna a nih mai bakah ram leh hnam venhimna a nih thu sawiin, infrastructure pawimawhte chu a rang lama thawk turin leh a hun taka zo turin a ngen. BRO Director General chuan a thil ngente lo ngaihthlak sakin, organisation chuan Sikkim-in kawng ṭha an neih theihna tura harsatna an tawhte hriatpuiin, theihtawpa an thlawp tur thu a lo hrilh.