Nagaland : Assam aṭanga dan loa luh tum phurtu motor 200 kir tir

Assam sorkarin an state-a dan loa sorkar ram luahte hnawh chhuah hna a kalpui mekah mi tam tak sawn chhuah an ni tawh. Heng hnawhchhuah zinga tam tak chu Nagaland-ah luh an tum a, mahse heng mite phurtu motor 200 chuang chu Nagaland police leh Central Reserve Police Force (CRPF) chuan checkpoint-ah lo dangin an kir tir leh.

Nagaland sorkar hian Assam-in an state-a dan loa lutte dap chhuah hna a thawh mek avangin, heng mite hi an state-a an lut tur uluk taka lo veng turin police-te pawh hriattirna a lo pe tawh a ni. Assam state hmalakna avang hian Nagaland bakah Meghalaya leh Manipur pawhin dan loa luh tumte uluk taka enfiah turin police-te an lo hriattir tawh bawk.

Assam ramri bula awm, Niuland district-a check gate hrang hrangah police-te pui turin district-level intelligence team dah an ni. Kar liam ta chhung khan Assam aṭanga luh tum phurtu 200 chuang an lo dang tawh a ni. Heng mite nihna hi checkgate ah uluk takin an lo enfiah a, Assam sorkar ram luah, tun hnaia sorkarin a hnawhchhuahte an ni tih hriatchhuah an nih hnuin Nagaland-a an luh an phalsak lo a ni.

Meghalaya pawhin Assam sorkarin a hnawtchhuahte an state-a lut tur veng turin state ramrite uluk zawka vil a ni dawn tih a sawi a, Manipur pawhin state task force a din tawh bawk.