BJP MP-in Tripura lighthouse project thawh zawmna tur ngen

Tripura chief minister hlui leh Bharatiya Janata Party (BJP) MP Biplab Kumar Deb chuan Pathianni khan thuchhuah siamin, union minister for housing and urban affairs, Manohar Lal Khattar chu Tripura-a lighthouse project thawh mek zawhna tur Rs vbc 49 pek belh turin a ngen tih a puang. He project hmang hian chenna in flat 100 sak tura ruahman a ni a, kum 2021 khan prime minister Narendra Modi-a'n virtual hmangin a lo hawng tawh a ni.

West Tripura district-a Ramnagar-a vantlang inkhawm buatsaihah thu sawiin, Deb chuan union minister Khattar chu tunhnai khan a hmuh thu a sawi lehin, ngenna hi a siam thu a sawi. Project thawhna hmun, Akhaura huamchhung ami chu leilung dinhmunin a zir loh avangin project fund awmsa hman zawh a ni tawh tih a sawi.

Project thawhna chu tui hna awm tamna hmun a nih thu leh,a foundation siamnaah sum tam tak a kal ral tih sawiin, Detailed Project Report (DPR) buatsaih laia an ngaihtuah tel loh thil a thleng tiin a sawi. Hei bakah Ministry chuan procedural clearance a awm theihna atan leh, audit kaihhnawih buaina awm lo turin sum pek belh tura rawtna a thlen thu a sawi ,hna thawh chhunzawm a nih thuai theina turin Rs vbc 20-25 tal pawh pe chhuak turin a ngen tih Khattar chuan a sawi. He project hi a rang lama zawh fel a nih chuan khua leh tui tan a ṭangkai dawn hle a ni, a ti.