Meghalaya: CM-in latex unit a hawng

Meghalaya chief minister Conrad K Sangma chuan Thawhṭanni khan East Garo Hills district-ah Meghalaya-a a hmasa ber leh hmarchhak biala a pahnihna turin thing hnai sawngbawlna hmun, latex unit a hawng. He unit hi state chhunga rubber chingtu mi 3,000 chuangin an chhawr thei dawn a ni.

Latex unit hi Songsak C&RD Block hnuaia Koksi Nengsat-ah din a ni a, state sorkar chuan Meghalaya basin Management Agency kaltlangin Rs vbc 18.8 a pe. Unit hi Garo Hills-a chengte leh state pumpuia rubber chingtute tan a pawimawh hle dawn tih CM chuan a sawi. Sorkarin loneitute a ngai pawimawh tih sawiin, loneitute thuam chakna tur program leh scheme hrang hrang an lo hawng tawh a, chung zingah chuan Focus, Focus+ leh CM Farm te an tel tih a sawi.

CM chuan loneitute sum lak luh a let hniha tih pun tuma ruahmanna a siam laiin, Meghalaya-ah lo neih lama in nghat mi tam tak an awm avangin a let hnih aia tama tih pun a ngai a ni, a ti. An economy target, USD tld 10 tlin turin loneitute dinhmun chawi kan a, tih hmasawn an ngai tih a sawi bawk.

Sangma chuan Meghalaya-a fruit dehydration unit hmasa ber dinna tur lungphum phum nghalin, project hi Rs vbc 23 senna tura ruahman a ni a, nakkum November thla hian peih fel hman tum a ni. Unit-ah hian kumtin thei metric ton 7,400 a sawngbawl theih dawn a, loneitu 5,000 chuangin an chhawr ṭangkai thei dawn a ni.