Sikkim : MP-in CBSE zirlaiah tribal ṭawng dah tel turin ngen

Sikkim Lok Sabha MP Indra Hang Subba chuan Education Ministry hnenah Sikkim-a hnam pali - Rai, Sherpa, Tamang leh Gurung ṭawngte chu CBSE hnuaia Class 11 leh 12 zirlaia optional subject-ah telh turin a ngen.

MP hian pawl pali - Sikkim Akhil Kirat Rai Sangh, Denjong Sherpa Association, Sikkim Tamang Buddhist Association leh All Sikkim Gurung Buddhist Association aiawhten an hmuh hnuah ngenna hi a siam a ni.

Subba chuan union education minister Dharmendra Pradhan chu Parliament House-a a hmuh bakah, state education minister Sukanta Majumdar pawh a chenna inah hmuin, hnam ziarang chawikan theihna zirnaa dah tel pawimawhnate a sawipui. Education Ministry hian December 20, 2024 khan heng ṭawng palite zirlaia dah tel tura ngenna chu a lo hnawl tawh a, mahse MP hian ngaihtuah ṭha leh turin a ngen.

Heng ṭawngte hi CBSE hnuaiah Class 9 leh 10 zirlaiah dah an ni a, pawl 11 leh 12-a dah loh chuan zirlai zir zawm zel turte tan harsatna a thlen thei tih Subba chuan ngenna siamah a tarlang. National Education Policy (NEP) 2020 zulzuia siam a ni tih sawiin, 2025-26 academic session-a telh turin a ngen nghal bawk.