Arunachal Pradesh : Police-ten lirthei ruk bo 57 hmu chhuak

Arunachal Police-te chuan state dang aṭanga lirthei ruk bo tawlhluh 57, Rs vbc 30.5 chuang man an hmu chhuak a, mi panga an man bawk.

Police te chuan lirthei an hmuh chhuahte hi ramchhunga police station-in ṭum khata motor ruk bo an hmuh chhuah tam tham ber niin an sawi.

Itanagar police superintendent Jummar Basar chuan press conference-ah lirthei ruk bo chungchanga inhnamhnawih mi panga man an ni tawh tih sawiin, la man lohte pawh an la chhui zui zel a, lirthei dang hmuhchhuah tumin hma lak mek a ni tih a tarlang bawk. Police-te chuan Bharatiya Nyaya Sanhita (BNS) section hnuaiah suo motu FIR ziak lutin, SDPO Kengo Dirchi kaihhruai Special Investigation Team (SIT) an din bawk.

Police-te hian July 2 aṭang khan lirthei ruk bo zawn beihpui chu Itanagar-ah an nei a ni. Lirthei rukte hi e-Sakshya portal kaltlanga finfiah niin, Delhi, Haryana, Uttar Pradesh leh state danga rukruk thubuai ziahluh tawhte nen a inzawm tih an hmu chhuak.

Lirthei 57 an hmuh chhuahte hi Toyota Fortuners pakua, Hyundai Cretas 27, Kia Seltos panga, Maruti Brezzas pahnih, Kia Sonets pahnih, Tata Safaris pahnih, Tata Harrier pakhat, Mahindra Thar pahnih, Mahindra Scorpio pakhat, Toyota Innova pakhat, Audi pakhat, Ford Endeavour pakhat, Hyundai Venue pakhat leh Maruti Baleno pakhat an ni.

SP Basar chuan mipuite chu lirthei an lei dawnin VAHAN portal emaw, tualchhung RTO-ah emaw a neitu diktak nihna kimchang hrechiang hmasa tur leh, lirthei document felfai tak nei chauh lei ṭhin turin a chah. Lirthei ruk bo hralh chungchanga rinhlelh an neih chuan police station hnai bera report turin a hriattir bawk.