Assam : Sorkarin JE hri leng do hna thawk zel

Assam state pumah Japanese Encephalitis (JE) hri kai chu an pung zel a, mi 26-in nunna an chan tawh bakah mi 300 chuangin an kai mek avangin state sorkar chuan hri leng tih tawp tumin nasa takin hma a la mek. Thosi hlo kah leh vantlang inzirtirna campaign hmangin hma an la mek a ni.

National Health Mission (NHM) in a tarlan danin, Assam district 35 zinga 33-ah kumin chhungin he hri kai hi an awm tawh a, Nalbari, Barpeta, Golaghat, Darrang, Nagaon leh Kamrup chu a tuar nasa zual an ni. Hailakandi leh Dima Hasao aṭangin hri kai report an la awm lo thung. Damdawi-ina an dah luh tamna ber chu Guwahati Medical College and Hospital (GMCH) ah niin, hri kai 44 enkawl an nih tawh bakah April thla khan he hri vang hian mi 10 an thi tawh.

Hri kai an pung zel avangin health official-te chuan thingtlang leh khawpui chhunga buh hmun leh vawk vulhna hmun, thosi pian tamna hmunah thosi hlo an kap a ni. Fur ruahtui tlak tam lai a nih avangin an hmalaknaah harsatna an tawk bawk a, an thosi hlo kahte chu ruahtuiin a len bo leh ṭhin tih an sawi.

He hri leng tihremna atan hian ASHA thawktute leh field staff-te chuan thosi hloa chiah thosilen an sem bakah, vantlang inkhawm huaihawt a ni bawk a, JE natna lan chhuah dan inzirtirna hunte an nei a ni. Mipuite chu tui chhuan so thianghlim chauh in tura hriattir an ni tih health worker pakhat chuan a sawi. Assam sorkar chuan National Vector Borne Disease Control Programme (NVBDCP) nen thawkdunin vaccination drive kalpui an tum tih an sawi bawk a ni.