Army Chief-in Manipur a tlawh

Chief of Army Staff (COAS) general Upendra Dwivedi chuan Nilaini khan Manipur tlawhin, venhimna kalpui dante a endik bakah, state-a Assam Rifle leh sipai awmte dinhmun thlirletna a nei.

COAS hi state dinhmun leh remna leh muanna a awm theihna tura hmalakna kal mekte kimchang taka hrilhhriat a ni. Dinhmun harsa tak kara venhim hna thawktute inpekna sang tak chu a fak hle. General Dwivedi hi GOC-in-C, eastern Command leh GOC, Spear Corps-ten an ṭawiawm a ni.

General Upendra Dwivedi hian Manipur governor Ajay Kumar Bhalla pawhin hmuin, venhimna leh hmasawnna chungchangte an sawidun. Hmasawnna thlenna kawnga civil administration leh armed force-ten thawh hona ṭha tak tak an neih dante an sawi. COAS hian Khuman Lampak Stadium-a Durand Cup vawi 134-na hawnna hun pawh telpuiin, inkhelh ṭan a nih hmain NEROCA FC leh TRAU FC player te nen inkawmna hun an nei. He tournament hi Imphal-ah hian kum hnih hnuah neih leh a ni.

General Dwivedi chuan remna leh muanna siam kawnga Indian Army-te mawhphurhna leh an chanvo pawimawhnate a sawi lang bawk. May 3, 2023 aṭanga state chhunga hnam leh hnam inkara buaina chhuakah hian mi 258 an thi tawh a, mi sang chuangin an chenna in leh lo chhuahsan tawh bawk.