Manipur : NIA-in Jiribam-a tualthahna thlenga inhnamhnawih pakhat man

Manipur-a Jiribam-a November 2024-a Meitei hmeichhe pathum leh naupang pathum rukbo leh thah an nihnaa inhnamhnawih nia rinhlelh pakhat chu National Investigation Agency (NIA) te'n an man.

Assam police-te chuan NIA in thu a hrilh bawhzuiin Thanglienlal Hmar, Boya tiha hriat hi an man a, NIA kutah an hlan nghal a ni.

Manipur High Court-in NIA chu thubuai chungchanga report pe tura thupek a chhuah aṭanga kar thum hnu leh, thla khat chhunga chargesheet thehlut tura tih an nih aṭanga ni hnih hnuah pawikhawihtu nia rinhlelh hi an man a ni. NIA thuchhuah chuan an mi man Thanglienlal Hmar, Assam Cachar district-a cheng chu he pawikhawihna rapthlak takah hian a inhnamhnawih ngei tih a tarlang. Jiribam-a Meitei mi an rukbo leh thahte hi chin hriat loha ni eng emaw zat an awm hnuah an ruang chu luiah chhar an ni.