KSU-in Mahadev Khola temple complex-a dan loa structure sak an khar

Meghalaya-a Khasi Students' Union (KSU) chuan Ningani khan Shillong-a Mahadev Khola temple complex-a dan loa structure sak zinga chenna in, ashram leh hotel-te chu an khar. Helai huamchhunga dan loa inbengbel te chu sawnchhuah an nih thuai an phut bawk.

Endikna an neihnaah KSU Upper Shillong leh Laban Circle unit-te chuan helai temple huamchhungah hian dan loa in sak a tam tih an hmu chhuak. KSU hruaitu Reuben Najiar chuan temple awm chu pawi an tih lo thu sawiin, dan loa sak structure 30 vel awm chu ngaihtuah tham a ni tih a sawi. Hemi chungchangah hian union chuan kum 2023 khan thuneitute hnenah pawh an lo thlen tawh a, thla thum chhunga report theh luh a nih tur thu an lo tiam a, mahse dan loa in sakte chu chhunzawm zel a ni tih an tarlang. .

Najiar chuan union chuan document nei lo, helai huamchhunga chengte chu sawnchhuah an phut thu a sawi. Helai hmun hi Lawsohtun emaw Upper Shillong Dorbar Shnong emaw thuneihna hnuaiah a awm lo tih sawiin, engtin nge sorkarin document a pek chhuah a, ration card leh EPIC te chu finfiahna mumal awm loin helai hmuna chengte chuan an neih theih an zawt a, thuneitute chu a rang lama hma la turin an ngen.